Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Kahu kiwi

Ngā tuhituhinga

Ko Rangi Te Kanawa tēnei. He kaitiaki taonga a ia ki Te Papa. He uri a Rangi nā te Whare Pora. Ko Diggress Rangitautahi Te Kanawa tōna kuia, ko Kahurangi Rangimārie Hetet tōna whaea. He ringa whatu kākahu, he kairaranga rātou katoa – he pūkenga o te whare pora.

Tēnā koe.
Ko Pirongia te maunga.
Ko Mangokiwa te awa.
Ko Ngāti Kinohaku, Uekaha, Ngāti Roroa ngā hapū.
Ko Ngāti Maniapoto te iwi.
Ko Rangituatahi Te Kanawa taku ingoa.
Tēnā koe.

He maha ngā momo kākahu. Ko te kahu kurī te mea rangatira rawa; kei konei te kaitaka, te kaitaka paepaeroa, te kahu kiwi, te kahu huruhuru, te pihipihi me te kahu tōī. Ka whakaatu atu au i te kahu kiwi i te tuatahi. Kua whakapaipaihia te kākahu nei ki te huruhuru kiwi, kua tānikohia te taitapa. Nō te kākā me te tūī ēnei huruhuru i te taha nei.

Kāore anō au kia mau i tētahi, engari kāore e kore he mahana rawa. Kīhai i kitea te maha o ngā kahu kiwi tae noa mai ki waenganui i te rautau tekau mā iwa. Nō muri iho ēnei kākahu i ngā kaitaka me ngā kaitaka paepaeroa o ngā tūpuna.

Ko tētahi mate nui, ko ngā kaka i whākanotia kia pango. Kua uhia te taitapa ki te raumata nei hei whakarite kia piri tonu ngā huānga, he whakamarumaru anō hoki. Ko te kahu kiwi tērā.

Ko ngā huruhuru kiwi ēnei. He ātaahua. E whā ngā huruhuru ki ia hukahuka. Ki te tatauria te katoa o ngā hukahuka i tētahi rārangi ka mōhio koe e hia ngā huruhuru i te kākahu nei. He huruhuru kākā ēnei – te wāhanga karaka kānapanapa nei – ko ngā huruhuru tūī ēnei, kei konei ngā huruhuru kererū. He ātaahua te kite atu i te hina o tēnei rūma.

I te taitapa tāniko o raro nei ka kitea ngā huānga kua whākanotia, arā ngā kaka pango i rangā hei tauira mahi. Engari nā te whakakinonga o ngā kaka kua whakapangotia, kua ngaro ētahi wāhanga. Nā reira, kua horahia a runga nei e tētahi raumata hei tiaki i te kākahu.

Ko te muka tānekaha ēnei. He kura te tae, he ātaahua rawa. Kei te kitea te nui o te mahi ki te whatu i tēnei kākahu.

Hoki ake ki runga ^