Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Kahu kurī

Ngā tuhituhinga

He kahu kurī tēnei. Ko te kākahu rangatira o ngā kākahu katoa. Kua whakapaipaihia ki te awe kurī – arā, te kurī i haere tahi mai i ō tātau tupuna i te hekenga nui mai i Hawaiki ki Aotearoa. Heoi, nā te whakawhitiwhiti momo kua ngaro tēnei kurī o Te Moananui-a-Kiwa. E kore e kitea anō ēnei kahu kurī. Ko te tikanga, mau ai te tāne i tēnei kākahu – ko te tangata tērā ka tū hei kanohi, māngai hoki mō te iwi, mō te hapū rānei. He tohu rangatira te kahu kurī. Nā te kahu kurī nei he māmā noa iho te tautuhi i te rangatira o te iwi.

Kei te kitea kua ngarongaro ētahi o ngā huruhuru i tēnei kahu kurī. Kei te taretare haere i ngā kokonga o runga nei, i raro iho nei anō hoki. Ko te mate nui rawa, i te mea he momo pūmua ngā huruhuru manu me ngā awe kurī nei, ka kainga e te ngārara. I runga i tērā, me noho ngā taonga nei ki tētahi wāhi haumaru – arā, kāore he puehu, kāore hoki he ngārara.

Me tika hoki te paemahana o te wāhi e pupuri ana i ngā taonga nei, me noho pūmau hoki te pīpīwai whai pānga. Kei waenganui i te rima tekau me te rima tekau mā whitu ōrau te pīpīwai tika mō ēnei kākahu, ā, kia āhua tekau mā whitu ki te rua tekau te paemahana tika. He pānga nui ō te paemahana me te pīpīwai ki ngā kahu kurī nei. Mehemea he maroke rawa ka kōtihetihe.

Kei konei ētahi wūru kua āta tāmirotia, hei whakapaipai noa iho te kākahu. He mahi nui te whatu i te kahu kurī. Kua whatua ia aho, kāore he āputa, arā, he ara i waenganui. He mahi nui tēnei. Ko te whatu aho tahi tēnei. Ko te nuinga o ngā kaiwhatu kākahu ka whai i te whatu aho rua – arā, kia rua ngā aho e here ana i ngā whenu – engari he whatu aho tahi tēnei, ā, he nui rawa atu ngā rārangi hei whatu. Inā kē te nui a ngā mahi i ēnei kākahu.

Hoki ake ki runga ^