Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Tāniko

Ngā tuhituhinga

Ko te tīpare tēnei. Nā tōku kuia tēnei i tāniko. E toru ngā tae, ko te pango o te paru, ko te parauri o te tānekaha me te kōwhai o te raurēkau. Ko te muka māori tēnei. Nō te hiako hīnau te tae mangu nei. Ka patua te kiri o te rākau, ka rumakina ki te wai, kātahi ka whakamahanatia te wairewa. Kātahi ka rumakina te muka ki te wai hīnau. Ka tangohia ake te muka, kātahi ka ūkuia te muka ki te paru – he momo paru kī tonu i ngā matūriki maitai. Ka whakaputa te tukanga whākano i te tae maitai tanini. Arā, ka tūhonohono ngā matūriki maitai ki ngā matūriki tanini kia puta mai ai te muka pango.

Ka ahu mai te tae keha i te kiri o te rākau tānekaha. Ka patua hoki tēnei, ka rumakina ki te wai, ka paeratia. Nō muri mai i te waiwai ki te wairewa tānekeha, ka tango ake te muka, ka pania te muka ki ngā pungarehu mahana.

I ngā rā o mua, ka pania ki ngā pungarehu o te rākau māhoe. He pāpāhua te pungarehu – nā tērā ka puta mai te tae keha i te tānekaha. Engari mō te raurēkau, arā, te muka kōwhai, he hāngai te mahi a tērā –kāore e hiahiatia ana he whakaū. Ka rumaki tikatia te muka i roto i te wairewa hiako raurēkau mō te waru haora i te iti rawa. Ina tangohia te muka, ka puta mai tēnei tae āhua kōwhai. Nā reira ka kīia tēnā e mātou he waikano hāngai.

Nā reira, ko te raurēkau tēnei, he waikano hāngai; ko te tānekaha te wāhi parauri nei, nō te hiako rākau tānekaha me te pungarehu; nō te hiako rākau o te hīnau te pango nei – arā, nā ngā matūriki maitai o te paru ka puta mai te pango. Otirā, he mea māori noa iho te mā – arā, kāore i whakataengia.

Hoki ake ki runga ^