Te ngohe: Te tūhurahura waikano – Ngā taumata 1 me 2
Ngā Whāinga Paetae: Te Pū me te More
1.1 me te 2.1 Ka mātakitaki me te whakamārama i ngā āhuatanga nui, pēnei i te tae, i te kakano, i te rongo, o ngā matū e mōhio whānuitia ana, me ngā panoni e puta mai i te ranu, i te whakawera, i te whakamātao rānei i te matū.
Te Marautanga o Aotearoa (wh. 99) Ō Kawekawe, Ngā Āhuatanga me ngā Panoni Matū.
Te putanga ako
Ka taea e au:
- te hanga matapaenga mō te ranu mea
- te ranu matū me te whakaahua i ngā panoni
- te whākano muka mā te whakamahi waikano nāku i whakarite.
| Ngā paearu angitu | Aromatawai whaiaro | Aromatawai ā-hoa | Aromatawai ā-kaiako | ||||||
| Tino pai | He pai | Āhua pai | Tino pai | He pai | Āhua pai | Tino pai | He pai | Āhua pai | |
| Ka taea e au te hanga matapaenga mō te ranu mea. | |||||||||
| Ka taea e au te ranu matū me te whakaahua i ngā panoni. | |||||||||
| Ka taea e au te whākano muka mā te whakamahi waikano nāku i whakarite. | |||||||||
Ngā utauta
- He toutou tī
- He kāpeti pūwhero
- He aniana
- He houra tunutunu
- He pire rino turuki pēnei i te Ferrograd kei roto ko te Pākawa Pungatara Rino
- He kapu pepa
- He tīkera
- He ngaruiti
- He tīpune me te naihi
- He muka, he tāhei papanga papahune mā rānei hei whākano.
Kei tēnei tūhuratanga ka waihanga waikano koe e rite ana ki ērā ka hangaia mā te whakamahi i te hīnau, te tānekaha, me te raurēkau. Ka whakamahi kētia e koe he toutou tī, he kāpeti pūwhero, me ētahi aniana pēnei i te ripanga i raro nei.
| Te waikano harakeke | He waikano kua hangaia ki ngā mea whakauru o te kīhini |
|---|---|
| Te hīnau kua ranua ki te paruparu whai rino | Te tī i tāpiritia ai te pire rino |
| Te tānekaha i ranua ki te pungarehu | Te kāpeti pūwhero i tāpiritia ai te houra tunutunu (ko te houra tunutunu he matū ka tāpiritia ki te paura pēkena ka hanga haurehu ina ranua ki te waikawa. Mā te haurehu e piki ai te rēwena.) |
| Te raurēkau | He kiri aniana |
Ka whai wāhi he panoni tae ki ēnei waikano katoa. I mua i te whakahaere i tō tūhuratanga, hangaia he matapaenga.
| Te waikano ka hangaia ki te: | Ko tētahi tae ka puta, ki tō whakaaro? |
|---|---|
| Te toutou tī i tāpiritia ai te pire rino | |
| Te kāpeti pūwhero i tāpiritia ai te houra tunutunu | |
| Ngā kiri aniana |
Te waihanga i te waikano
1) Te waikano toutou tī
Ringihia he hauwhā kapu wai paera ki runga i te toutou tī. Waiho kia waiwai ana mō te meneti kotahi. Tangohia te toutou tī, ka tāpiri i te hauwhā pire turuki rino kua nakunakuhia.
2) Te waikano kāpeti pūwhero
Paeratia he kapunga kāpeti pūwhero kua kōripia i roto i te kapu wai mō te 2 meneti. Tangohia ngā rau kāpeti, ka hoatu kia rua ngā tīpune houra tunutunu.
3) Te waikano aniana
Paeratia he kapunga kiri aniana i roto i te kapu wai mō te 2 meneti.
- He aha ngā huringa tae e kite ana koe?
| Te matū waikano | Te tae i mua | I muri i te tāpiri i ēnei: | Te tae i muri |
|---|---|---|---|
| He toutou tī | He pire rino | ||
| He kāpeti pūwhero | He houra tunutunu | ||
| He kiri aniana | He wai wera |
- I panoni te tae o ēhea waikano?
- Ka whakamahia ēhea atu tipu hei hanga waikano?
Whakaritea he muka, ka tapahi tāhei papanga mā rānei, ka waiwai ki te wairewa waikano wera mō te 5 meneti. Tangohia ēnei i te wairewa, ka whakamaroke.
Ka taea te hanga i ngā wairewa i ngā kapu pepa me te whakawera i roto i te ngaruiti.