Harakeke 7
Te ngohe: Te ora tōkai o te tipu (wāhanga 1) – Te taumata 3
Ngā Whāinga Paetae: Te Weu
Ka whakarōpū whānui ā-pūtaiao i ētahi rauropi. Te Marautanga o Aotearoa (wh. 100) Te Ao Tūroa, Te Rauropi.
Te putanga ako
Ka taea e au:
- te whakaahua ka pēhea ētahi tipu rerekē e whakaputa uri ai
- te whakatakoto whakaritenga mō ngā āhua whakaputa uri o ētahi tipu rerekē.
| Ngā paearu angitu | Aromatawai whaiaro | Aromatawai ā-hoa | Aromatawai ā-kaiako | ||||||
| Tino pai | He pai | Āhua pai | Tino pai | He pai | Āhua pai | Tino pai | He pai | Āhua pai | |
| Ka taea e au te whakaahua ka pēhea ngā tipu rerekē e whakaputa uri ai. | |||||||||
| Ka taea e au te whakatakoto whakaritenga mō ngā āhua whakaputa uri o ētahi tipu rerekē. | |||||||||
Kimi mōhiohio i tō whānau, i ō kaumātua, i te Ipurangi anō hoki mō ngā āhua whakaputa uri o te punga, o te harakeke, o te rimu, o te kōwhai anō hoki. Ka hiahia pea koe ki te ārohi i ngā wāhanga o ngā tipu mā te karu whārahi, me te hanga tātuhinga. Ka taea ētahi mōhiohio anō mā te whakamahi pukapuka, mā te Ipurangi rānei. Ina mōhio koe ki ngā āhua whakaputa uri o aua tipu, ka taea te whakarite i aua tipu tētahi ki tētahi. Me whakauru i ēnei ki tō whakaritenga:
- Ko ēhea tipu e whakaputa puāwai? Mēnā kāore ētahi tipu e whakaputa puāwai, ka pēhea kē te momo whakaputa uri o aua tipu?
- Ka whakaputa kākano aua tipu? Ki te kore, he aha kē tō aua tipu?
- Mēnā ka whakaputa kākano, he aha te āhua o aua kākano? Ka whai wāhi rua ngā kākano pēnei i te pīnati, he wāhi kotahi rānei o te kākano pēnei i te kākano kānga? He aha te rerekētanga i waenga i ngā tipu kua ahu mai i ngā kākano whai wāhi kotahi me ērā kua ahu mai i ngā kākano whai wāhi rua?