Ngā Waka 2
Ngā tōpana whārite me ngā tōpana kāore i te whārite
Ngā tōpana whārite
Mēnā kāore tētahi mea i te neke he whārite ngā tōpana ka pā ki taua mea.
Tōpana taumaha o ngā kaihoe = tōpana tautoko o te waka
Pātai 1: Kei te neke te waka? Kei te whārite ngā tōpana, kāore i te whārite rānei?
Pātai 2: Ki tō whakaaro, he aha te pānga kei waenga i te tōpana taumaha o te tangata me te tōpana tautoko o te waka? Kei te whārite ngā tōpana, kāore i te whārite rānei?
Pātai 3: Mēnā ka noho ētahi tāngata tokorua i roto i te waka, ka whārite te tōpana tautoko o te waka me te tōpana taumaha o ngā tāngata, kāore i te whārite rānei? He aha ai?
Pātai 4: Ki tō whakaaro, ka aha mēnā ka eke ētahi tāngata tokowhitu ki roto i te waka? He aha ngā panoni ka puta i ngā tōpana tautoko me ngā tōpana taumaha? Kei te whārite ēnei tōpana, kāore i te whārite rānei?
Ina haere tētahi mea i te tere pūmau he whārite anō hoki ngā tōpana. Mēnā i te hoe tētahi rōpū kaihoe kia haere te waka ama i te 10 k.m./h (te tere o tētahi kaihīkoi tere), he ōrite te tōpana o ngā hoe e pana ana ki te wai ki ngā tōpana ātete o te wai e pana ana ki te takere me te hau e pana ana ki ngā tāngata.
Tōpana pana o ngā kaihoe = tōpana ātete o te wai me te hau
Ngā tōpana kāore i te whārite
Ina kāore i te whārite ngā tōpana e pā ana ki tētahi mea, ka whakatere te mea, ka whakapōturi rānei.
Ina tīmata tētahi rōpū waka ama ki te tauwhāinga, ka nui noa atu te tōpana pana i ngā kaihoe i te tōpana ātete o te wai me te hau. Nā reira, ka whakatere te waka ama. Nā te mea he nui atu te tōpana pana i te tōpana ātete, kāore ngā tōpana i te whārite.
Te ine tōpana
Ka ine tātou i te tōpana ki te waeine e kīia ana te niutana (te N rānei). He ōrite ngā niutana tekau ki te kotahi manokaramu.
Pātai 1: He aha tōu tōpana taumaha ina inea ki te niutana?
Pātai 2: Mēnā ka eke koe ki roto i tētahi waka ama, ka aha te tōpana tautoko ā-niutana o te waka?