He aha te mātai hangarau koiora?
Ko te mātai hangarau koiora, ko te whakamahi i ngā tukanga koiora, ngā rauropi, ngā pūnaha rawa rānei, hei hanga hua e pai ake ai te oranga ā-tangata. Kei roto anō ngā tukanga pērā i te haurapa-koiora (bioprospecting), me te raweke ira.
Ko te haurapa-koiora te āta hāhau i ngā pūhui whaiwaro (organic compounds) e tipu noa mai ana i ngā rawa koiora pēnei i te moroiti, te tipu, me te hekaheka, e noho mai rā ki ngā taiao inati, hei tauira: i ngā kōpua poharu, i ngā koraha, i ngā waiariki, i ngā ngahere nui te ua, me ngā ara i ngā rohe maunga. I te nuinga o ngā wā ka aro atu ngā kaipūtaiao ki te mōhiotanga taketake o te tangata whenua ki ēnei mea, me ōna whakamahinga o ēnei mea, me tā rātou whakamahi i ēnei rawa hei rongoā. Ka rangahaua ēnei mea, ā, ko te putanga iho o tēnei rangahau, ka whai painga nui ki ngā kamupene mātai take rongoā, i te mea, ko ngā matū ka kitea, tērā pea ka taea te whakamahi mō te rongoā hou, nā reira, he hua ohaoha e wātea ana ki ngā “rangatira”, nā rātou ngā rawa koiora. Ka tirohia anō hoki te wāhi ki ngā rangahautanga nei i roto i ngā mahi raweke ira.
Kia āta whakarerekētia te hunga ira i te karihi o te pūtau, ka kiia tēnei mahi ko te raweke ira. Kua anga ngā kaipūtaiao ki te raweke i ngā ira o te kararehe, ki te āwhina i ngā tāngata ki te whakatika i ngā tahumaero. Whakamahia anō ai te raweke ira hei raweke i te DNA o ngā tipu, tae noa ki ngā tipu ka ātete atu i ngā mea patu otaota (ngā matū whakamahia ai hei patu tarutaru), me te hanga tipu whai huarākau e kore e ngohengohe, kia taea ai te kawe mā runga waka.
Hei mahi 1
Whakamāramatia mai te take e pīrangi ai ngā kaipūtaiao ki te rangahau i te hanganga o ngā rauropi kei ngā moremorenga taiao, pēnei i te waiariki me te koraha.
Hei mahi 2
Whakamāramatia mai te whakamahinga o ngā tipu kua rawekehia ngā ira, hei painga ōhanga mō te tangata.