He pēhea te āhua o te raweke ira?
Ina whakamahia te hangarau-koiora hei whakarerekē i te huinga ira i te karihi o te pūtau, ka kīia tēnei he raweke ira.
Ka riro mā ētahi pūmua whākōkī whakaita e tapahi te pītau ira ki ōna anō raupapa e tika ana. He nui ake i te 400 ngā momo pūmua whākōkī whakaita nei, e kotikoti ana i ētahi wāhi rerekē 100 o te pītau ira. He rerekē ngā raupapa pītau ira e mōhio atu ana ia pūmua whākōkī nei, ka mutu, he rerekē te āhua o te tapahi a tēnā, a tēnā pūmua whākōkī i te pītau ira. Ka tapahia ki ōna anō takirua, ā, mai i te whā ki te waru te maha o ngā takirua nei. Mā ngā tohunga pūtaiao e whakatau ko tēhea raupapa i te pītau ira te mea e hiahia ana rātou ki te raweke, nā runga anō i ngā ira kua tohua mō tēnei mahi.
Ina tapahia te pītau ira ki te pūmua whākōkī whakaita, ka oti mai he pito pūhuki, he pito hāpiripiri rānei.
Ka taea e ngā pito hāpiripiri te hono atu ki ētahi atu kanoi e noho takahoa ana te raupapa.
Ka tapahia ngā pito pūhuki o te pītau kia kore ai ēnei e hono ki ētahi atu.
Hei tautohu i ngā raupapa pītau ira, ka whakamahia e ngā tohunga pūtaiao he pūmua whākōkī anō, he tapanga iraruke, he tapanga tae kōrekoreko rānei. Ina tapahia mai te pītau ira ki te pūmua whākōkī whakaita, mā ngā tapanga nei e āwhina ngā ringa pūtaiao ki te āta tautohu i ia ira.
Tērā anō tētahi tukanga e kīia nei ko te Polymerase Chain Reaction (PCR), e huhua ai te tāruatanga o tētahi ngarangara pītau ira, o tētahi mekameka pītau ira rānei, ina hiahiatia he pītau ira rahi tonu. Ko ētahi mahi e hiahiatia ai he pītau ira rahi tonu, ko te whakaraupapa pītau ira, ko te waihanga hua pītau ira, me te pūrua pītau ira.
He mea wehewehe ā-hiko te pītau ira, rā roto i tētahi momo pia, e wehewehe ai ngā mea rahi ake i ngā mea iti iho. Mā konei e taea ai e ngā tohunga pūtaiao te tautohu te pītau ira o tēnā momo ora, o tēnā momo ora o te ao. I te Kaupapa Tautohu i te Huinga Ira Tangata, i āta kitea e ngā ringa pūtaiao ngā raupapa pītau ira katoa o roto i a tāua, te tangata.
Hei mahi
Whakamāramatia te mahi a te pūmua whākōkī ki te whakarerekē i te DNA.