Waikano 4
Te ngohe: Te whakamātau waikawa – Te taumata 4
Te Whāinga Paetae: Te Aka
4.1 (i) Ka whakarōpū i ētahi matū mā te mātakitaki me te ine i ngā āhuatanga ōkiko, kawekawe hoki, pēnei i te kawe hiko, te kawe pōkākā, me te waikawatanga. Te Marautanga o Aotearoa: (wh. 101) Ō Kawekawe, Ngā Āhuatanga me ngā Panoni Matū.
Te putanga ako
Ka taea e au:
- te hanga i tētahi wairewa i ngā raupua putiputi
- te whakamātautau i ngā matū noa mō te waikawatanga mā te whakamahi i te wairewa putiputi.
| Ngā Paearu Angitu | Aromatawai whaiaro | Aromatawai ā-hoa | Aromatawai ā-kaiako | ||||||
| Tino pai | He pai | Āhua pai | Tino pai | He pai | Āhua pai | Tino pai | He pai | Āhua pai | |
| Ka taea e au te hanga i tētahi wairewa i ngā raupua putiputi. | |||||||||
| Ka taea e au te whakamātautau i ngā matū noa mō te waikawatanga mā te whakamahi i te wairewa putiputi. | |||||||||
Kei tēnei tūhuratanga ka whakamahi koe i te wai raupua ki te whakamātautau i ētahi matū kia kite mēnā he waikawa, he kawakore rānei aua matū. I mua i te whakahaerenga o tō tūhuratanga, hangaia he matapae (he whakatau tata ka tūpono pea te aha ā muri atu) mēnā he waikawa, he kawakore rānei te matū ka whakamātauria e koe.
| Matū whakamātau | Te matapae mēnā he waikawa, he kawakore rānei te matū whakamātau |
|---|---|
| He winika | |
| He horoi umu | |
| He pēniho | |
| He hopi teretere | |
| He waihonga huakiwi |
Ngā utauta
- He putiputi o te momo ōrite (ka whakamahi te kāpeti pūwhero rānei)
- He paepae mataono tio, he kirihou me te mā
- He ngōpata kua hangaia mai i te wāhi poto o te pūngote me te 'Blu-Tack' kua peia ki roto i tētahi pito.
- Te whānuitanga o ngā matū kia whakamātautauria: te waihonga rēmana, te houra tunutunu, te winika, te horoi umu, te pēniho, te hopi teretere, te paura pēkana, te waihonga huakiwi.
Te tikanga
- Tangohia ngā raupua o te putiputi i tīpako koe, ka puru ki roto i tētahi pēke kakati kirihou. ME MAHARA: Me ōrite rawa te tae o ngā raupua katoa, me kato rawa mai i te momo putiputi ōrite.
- Hoatu tētahi pune rahi pea o te wai ki ō raupua. Kia tūpato! Kaua e nui rawa te wai. Me noho kukū tēnei wairewa. Kurutētia tonutia ngā raupua i roto i te pēke kia huri rā anō te tae o te wai.
- Tuhia te huringa tae ki te ripanga kei raro, ki te rārangi (a).
- Whakamahia he tīpune, he ngōpata rānei kua hangaia i te pūngote, ka whakawhiti kia 5 pea ngā pata o tō wai raupua ki tētahi wāhanga o te paepae mataono tio.
- Hoatu he pata waihonga rēmana ki ō pata wairewa raupua. Tuhia te huringa tae ki te ripanga kei raro, ki te rārangi (b).Koinei te tae o te wairewa i muri i te tāpiritanga o te waikawa.
- Hoatu ētahi tōpata houra tunutunu ki ō pata wairewa raupua. Tuhia te huringa tae ki te ripanga kei raro, ki te rārangi (c). Koinei te tae o te wairewa i muri i te tāpiritanga o te kawakore.
- Hoatu he pata o tō matū whakamātau ki ō pata wairewa raupua. Tuhia te huringa tae ki te ripanga kei raro.
- Tukuruatia tēnei mō tēnā me tēnā o ō wairewa whakamātau. Mō ia wairewa whakamātau whakatauritea te tae ki te wai, te waihonga rēmana me te houra tunutunu, ka tuhituhi mēnā he waikawa, he kawakore, he ngū rānei tō wairewa whakamātau. Kua waiho ngā rārangi wātea mō ōu ake matū whakamātau.
| Matū whakamātau | Tae o te wai raupua ina tāpiritia te wairewa whakamātau | He waikawa, he kawakore, he ngū rānei tō matū whakamātau |
|---|---|---|
| a) wai | Ngū | |
| b) waihonga rēmana | Waikawa | |
| c) houra tunutunu | Kawakore | |
| d) winika | ||
| e) horoi umu | ||
| f) pēniho | ||
| g) hopi teretere | ||
| h) waihonga i tētahi hua | ||
| i) | ||
| j) |
- Ko ēhea o ngā matū kei runga he waikawa? He aha ngā āhuatanga pūnoa o ēnei matū?
- Ko ēhea o ngā matū kei runga he kawakore? He aha ngā āhuatanga pūnoa o ēnei matū?
Ki hea ināianei?
Ki ō whakaaro, kei ēhea wāhi pea e hira ana kia whakamātautau koe mō ngā waikawa, ngā kawakore rānei? He aha i hira ai?
Mā te kaiako
Mēnā he uaua taua pātai ki ngā ākonga, whakatenatenatia rātou kia rapu mōhiohio mō ngā puna kaukau, ngā parawē mai i ngā wheketere me ngā pāmu.